آج کل اپنی کبڈّی ٹیم کے حوالے سے مسلسل ٹی وی سکرین پر دکھائی دینے والے بالی وڈ کے اداکار ابھیشیک بچّن جلد ہیاومیش شکلا کی فلم ’آل از ویل‘ کے ساتھ سلور سکرین پر بھی نظر آئیں گے۔
سنہ 2010 میں ریلیز ہونے والی فلم ’کھیلیں ہم جی جان سے‘ ابھیشیک کی بطور سولو ہیرو آخری فلم تھی اور اب پانچ برس بعد سولو ہیرو کے طور پر ان کی یہ فلم آرہی ہے۔
اس موقع پر بی بی سی سے ہوئی خاص بات چیت میں ابھیشیکبچّن نے بتایا کہ ان کے لیے یہ فلم بہت اہم ہے۔
ہر ناکامی سے سبق سیکھا
فلم انڈسٹری میں ابھیشیک کو آئے اب پندرہ برس ہوگئے ہیں اوراس دوران انھوں نے کئی فلموں میں اپنے فن کا مظاہرہ کیا ہے۔
لیکن ابھیشیک کی مانیں تو انھیں خود اب تک کی کوئی اپنی فلم پسند نہیں ہے۔
وہ کہتے ہیں ’مجھے میری کوئی فلم پسند نہیں ہے۔ جب بھی میں اپنی فلم دوبارہ دیکھتا ہوں تو لگتا ہے کہ اس سین کو اور اچھی طرح سے کر سکتا تھا۔‘
اپنی ناکام فلموں کے بارے میں ابھیشیک کہتے ہیں ’ہر ناکام فلم سے میں نے کافی کچھ سیکھا ہے لیکن ہاں میں نے اب تک جتنی بھی فلمیں کی ہیں انھیں لے کر کوئی افسوس نہیں ہے۔‘
ابھیشیک اپنے کریئر سے خوش ہیں اور خود کو خوش نصیب سمجھتے ہوئے کہتے ہیں کہ ایسے بہت کم لوگ ہیں جو اتنے برس تک انڈسٹری میں کام کر پاتے ہیں۔
بچّن ہونے کا نقصان نہیں
ابھیشیک کا خیال ہے کہ اگر آپ کسی مشہور اداکار، پیشکار یا ہدایتکار کی اولاد ہیں تو انڈسٹری میں آنا زیادہ آسان ہو جاتا ہے۔
ان کا کہنا تھا ’آپ کے والدین سے منسلک یادوں کے مداح ناظرین آپ کو دیکھنا چاہتے ہیں لیکن آپ پر دباؤ بھی بہت ہوتاہے۔‘
اپنے والد کے نام کا دباؤ ہونے سے متعلق ایک سوال کے جواب میں ابھیشیک کہتے ہیں ’نہیں، مجھے کسی قسم کا دباؤ کبھی محسوس نہیں ہوا ہے، اور نہ ہی مجھے اس سے کوئی نقصان پہنچا ہے۔‘
ابھیشیک اپنے والد امیتابھ بچّن کو اُس نسل کا سب سے عمدہ اداکار مانتے ہیں اور جلد ہی ’شمیتابھ‘ کے بعد اپنی کمپنی اے بي سي ایل کے بینر تلے ایک اور فلم لانچ کرنے والے ہیں جس کی سکرپٹ پر کام چل رہا ہے۔
نہ ایشوریہ اور نہ اجے
ابھیشیک آج کل کبڈی لیگ میں اپنی ٹیم کے سبب بھی کافی مصروف ہیں اور اسی دوران جے پور میں وہ ایک میچ کے دوران اجے دیوگن کے ساتھ نظر آئے تھے۔
اس کے بعد قیاس آرائیاں ہونے لگیں کہ دونوں اداکار ساتھ میں کوئی فلم کرنے والے ہیں۔ لیکن ابھیشیک نے اس بات کو رد کرتے ہوئے کہا ’نہیں، ہم دونوں فی الحال کسی فلم میں کام نہیں کر رہے ہیں۔ اجے جے پور صرف میچ دیکھنے آئے تھے۔‘
وہیں اپنی اہلیہ ایشوریا رائے کے ساتھ کسی فلم میں نظر آنےکی بات پر وہ کہتے ہیں ’راون یا گرو جیسی کسی اچھی سکرپٹ کا انتظار ہے۔ ہم ساتھ کام کرنے کو تیار ہیں، صرف کہانی ہم دونوں کو پسند آنی چاہیے۔‘
ویسے یہ مہینہ ایشوریہ اور ابھیشیک دونوں کے لیے بہت خاص ہے۔ اس ماہ جہاں ابھیشیک کی فلم ’آل از ویل‘ ریلیز ہوگی وہیں بچی کی پیدائش کے بعدایشوریہ کی
واپسی کے بعد پہلی فلم ’جذبہ‘ کا ٹریلر بھی اگست میں ہی متعارف کیا جائےگا۔
No comments:
Post a Comment