امریکہ میں نیویارک کی ایمپائر سٹیٹ
بلڈنگ پر ان جنگلی جانوروں کی تصاویر کا مظاہرہ کیا گیا ہے جن کی نسل معدوم
ہونے کے خطرے سے دوچار ہے۔
سنیچر کی رات شہر کی تیسری بلند ترین
عمارت کی دیواروں پر روشنی کی مدد سے بنائی گئی ان تصاویر کی نمائش کا مقصد
جنگلی جانوروں کی مختلف انواع کے زمین سے ختم ہو جانے پر بحث کو چھیڑنا
ہے۔جانوروں کی جن نسلوں کو مٹ جانے کا خطرہ ہے ان میں برفانی چیتا، شیر اور کئی سمندری مخلوقات شامل ہیں۔
زمبابوے میں ایک امریکی شہری کی گولی کا نشانہ بننے والے شہرت یافتہ شیر، سِیسل، کی بھی ایک 350 فٹ اونچی تصاویر رنگ و روشنی کے اس مظاہرے میں شامل تھی۔
منتظمین کا کہنا ہے کہ یہ اپنی نوعیت کا پہلا تصویری مظاہرہ تھا جو ایک پروجیکٹر کی مدد سے کیا گیا۔
مجموعی طور پر 160 انواع کی تصاویر دکھائی گئیں، جن میں کنگ کانگ کی شبیہہ بھی شامل تھی۔
آٹھ منٹ طویل یہ مظاہرہ مقامی وقت کے مطابق رات کے نو سے بارہ بجے تک ہر پندرہ منٹ کے بعد دہرایا گیا جو بہت دور سے دیکھا جا سکتا تھا۔
ایمپائر سٹیٹ بلڈنگ 381 میٹر بلند ہے۔
ان تصاویر کی نمائش کے لیے 40 پروجیکٹر استعمال کیے گیے۔
یہ نمائش ڈسکوری چینل کی ایک نئی سیریز، ریسنگ ایکسٹِنکشن (معدومیت کی دوڑ)، کی تشہیری مہم کا حصہ تھی۔
No comments:
Post a Comment